fabrica
Lo Mag
: Tota la creacion occitana
fabrica
“Èra a la fin de julhet, crese, o als jorns primièrs d’agost. Per un estiu de terrible caumanhàs. Los cats s’estremavan dins las cròtas. E los cans, defòra, cercavan l’ombra, e la pèira lisa, per s’i espandir. E tiravan de lengas de dos palms, que fasián son degot, sens relambi. Los òmes, totes, e las femnas, plan segur, èran condemnats a la meridiana”*.
Paisatge d’estiu que Max Rouquette nos descriu amb lo realisme qu’es lo privilègi dels poètas los mai grands. E, se la sèsta demòra un bon remèdi contra la calorassa, existís d’autres biaisses de se’n remetre. Sufís de prene un bon libre, plan espés, e de se daissar menar dins los inframondes de la ficcion e de la narracion.
Dins lo quadre del centenari Robèrt Lafont que lo CIRDÒC - Institut occitan de cultura dobriguèt al mes de mars - amb lo sosten de la Region Occitània - vaquí l’escasença de se lançar dins La Fèsta, vertadièr viatge picaresc dins los temps e un archipèl de luòcs.
Autre centenari, lo de Bernat Manciet que l’establiment celebrarà per la dintrada - amb lo sosten de la Region Novèla Aquitània. Amb L’Enterrament a Sabres sèm a la cima de la lirica occitana ont se questiona lo mistèri de l’existéncia al travèrs la vida d’una societat locala.
Qualquas pistas de mai : per las Jornadas Europeanas del Patrimòni, sul site de Besièrs, se presentarà la mòstra omenatge a Daniel Fabre : “Voir le monde a l’envers”. Per qué pas ne profiechar per descobrir Sus los Francimands, racontes que reculhiguèt alprès de l’extraordinari contaire que foguèt Pèire Pous.
Enfin, e per acabar de se desliurar de la canicula, un pauc de foliá e de virtuositat amb Lou Siège de Cadaroussa de l’abat Jean-Baptiste Fabre que serà mes a l’onor per la davalada mercés a un partenariat entre l’editor A l’Asard Bautezar ! e lo CIRDOC - Institut occitan de cultura.
Alavetz, per un pauc de frescor, un sol programa : la lectura !
Contactez nous a propos de cette page